भान हरपले भाव गुंतले नजरी नजर ही भिडताना
मी तू पण ते संपून गेले नजरी नजर ही खिळताना
तुझ्या कटाक्षी संमोहूनी मन खोल बुडाले तरताना
तुझ्या कटाक्षी मोहुनी तरले भवसागरी या बुडताना
तार छेडली दिडदा दिडदा ह्रदया ह्रदयी जुळताना
मी तू पण ते संपून गेले नजरी नजर ही खिळताना
भृंगापरी मी मधुरस प्यावा कमलदली या खुलताना
भृंगापरी हो बंदिवान मी कमलदली या मिटताना
क्षणोक्षणी हे असे घडावे दृष्टा दृष्टी मिळताना
मी तू पण ते संपून गेले नजरी नजर ही खिळताना
स्वप्न लोचनी रोज पहावे फुलताना अन विरताना
सत्य होऊनी उभे ठाकता मीच विरावे फुलताना
कुणी पाहिले कुणा पाहिले असे प्रश्न मग नुरताना
मी तू पण ते संपून गेले नजरी नजर ही खिळताना
तूच दिसावे जळीस्थळी मज जगताना अन मरताना
जगणे मरणे संपून जावे ध्यान तुझे मग स्मरताना
तुझी भावना मनात माझ्या शब्द रूपाने ठसताना
मी तू पण ते संपून गेले नजरी नजर ही खिळताना
