विलीन

वळताच नजर माझ्याकडे मी हरखून जाते
नजरेच्या डोहात .. खोल खोल हरवून जाते
आणि होतो खेळ खलास

नजर झुकते खाली
खुदकन खुलते खळी
डोळ्यात उतरते नशा
धुक्यात हरवतात दिशा
अंगाच मोरपीस नजरेच्या स्पर्शाने मोहित होते
आणि होतो खेळ खलास

वळताच नजर माझ्याकडे मी हरखून जाते
नजरेच्या डोहात .. खोल खोल हरवून जाते

जहरी डंख उतरतो थेट ह्रदयी
क्षणात भिनते कळ मस्तकी
सरसरून गात्रात भिनतो दंश
मीपण सरते उरतो फक्त तुझाच अंश
कळत नाही कशी मी तुझ्यात विलीन होते
आणि होतो खेळ खलास

वळताच नजर माझ्याकडे मी हरखून जाते
नजरेच्या डोहात .. खोल खोल हरवून जाते