मला माहित आहे ... मी बोलावलं म्हणून
तूच आलीस ... पाऊस बनून
गालावर चुंबून पहिलाच थेंब ...
तुझ्या आगमनाची वर्दी देऊन गेला
मागोमाग मातीचा सुखद सुगंध ...
तुझा ओला सहवास दरवळला
थेंबाथेंबाने अलवारपणे ...
माझे सर्वांग स्पर्शून
तूच आलीस ... पाऊस बनून
मला माहित आहे ... मी बोलावलं म्हणून
थेंबाळ सरी अन सरींचे ओघळ ...
तुझा आवेग हळूच बनला वादळ
चिंब भिजून ... गात्रागात्रात ...
सळसळत शिरला तुझा कोसळ
मग तू बेभान बरसलीस ...
भन्नाट वार्यावर स्वार होऊन
तूच आलीस ... पाऊस बनून
मला माहित आहे ... मी बोलावलं म्हणून
रसरसून ... तुझ्या मिठीत नहात नहात ...
आसूसून ... कवटाळले मीही माझे दोन्ही हात
तू खळखळून हसलीस ना ...
माझा वेडेपणा पहात पहात
आलीस ... तशीच अकस्मात गेलीस ...
मोहरले क्षण मागे ठेवून
मला माहित आहे ... मी बोलावलं म्हणून
तूच आलीस ... पाऊस बनून
तूच आलीस ... पाऊस बनून
तूच आलीस ... पाऊस बनून
No comments:
Post a Comment