गुढी पाडव्याच्या हार्दिक शुभेच्छा !

आत्मप्रकाश

मोकळे आकाश आकाश

भरला प्रकाश प्रकाश

वर आभाळाच्या भाळी

विणली प्रकाशाची जाळी

त्यात अडकले मन

झाले उन्मन उन्मन

ऐशा उन्मनी जीवनी

चाले संसार संसार

पाश संसाराचा दाट

होई अंधार घनदाट

भेदी अंधाराच्या भिंती

आत्मप्रकाश प्रकाश

ऐसा तो आत्मप्रकाशी

विरे मोकळ्या आकाशी

सखा म्हणे माझे मन

मोकळे जरी अडकून 

आस

सांग तुला लागली कशाची आस
सख्या असा होऊ नको तू उदास

मनाचा खोटेपणा मोठा न्यारा
मांडून बसतो संसार सारा
मिरवीत बसतो आपुला तोरा
जागेपणी धरी स्वप्नांची कास
सख्या असा …

नात्याचा गोता किती सांगू मोठा
जोडीत बसतो फाट्याला फाटा
गुंतवळा जैशा सागरी लाटा
कर्दमी शोध तू कमळाचा वास
सख्या असा …