सरीवर सरी आल्या पावसाच्या भारी
ऐक माझं पोरी जरा रहा आज घरी
फोफावली वावटळ घालते रिंगण
खोल खोल तळे झाले अंगण अंगण
गडगड गडगड ढग जड बोले
कडकड वीज कशी कुठेही कोसळे
उन्मळून झाड बघ धराशायी झाले
सवे त्याच्या शेजारचे घरही झोपले
नदीलाही झिंग आली धावते बेफाम
तीरालाही ओळखेना सुटे बेलगाम
शेती घातली पोटात आली वेशीपाशी
घास गिळण्या गावाचा झाली वेडीपिशी
भिजलेल्या काळजात खोल ऊठे कळ
दाही दिशी पसरला सैतानी झाकोळ
पावलोपावली महाकाल दबा धरी
पुसू जाता एका दिसे दुजा शोक करी
ऐक माझं पोरी जरा रहा आज घरी
सरीवर सरी आल्या पावसाच्या भारी
No comments:
Post a Comment