मैत्री

दोन मैतरांची  ... जुनी ही कहाणी

एक राहे गगनी ... दुजा वाहे अवनी

सागराची गाज ... एक आर्त नाद

चंद्रकला सोळा ... सागरास साद

मासी दोन दिसी ... दोघेही उन्मनी

एक राहे गगनी ... दुजा वाहे अवनी

नदी नाले यांचा ... जमवुनिया  मेळा

एक एक बुन्दा ... करोनिया गोळा

निरंतर झेप ...  फेस फुटे वदनी

एक राहे गगनी ... दुजा वाहे अवनी

घालतोय पिंगा ... चंद्रमा अतृप्त

भेट न हो शक्य ... तसा होई लुप्त

विझवुनी दीप ... आकाश सदनी

एक राहे गगनी ... दुजा वाहे अवनी