दाम करी काम

दामाजीचे गुलाम सारे माहित होते मला
तू प्रेमाचे मोल अलौकिक का सांगितले मला

मीठ भाकरी मिळवून खाऊ
पांघरूनी नभ सुखात राहू
अशा तुझ्या त्या शब्दामधुनी झालो नादखुळा
तू प्रेमाचे मोल अलौकिक का सांगितले मला

फुलपाखरू चुंबून वदले
तुझ्यात माझे विश्व वसले
मधु संपता गेले उडूनी शोधित नवीन फुला
तू प्रेमाचे मोल अलौकिक का सांगितले मला

सत्ययुगी ते सत्य संपले
शब्दही कवडीमोल जाहले
विकले जाते एकजीव मन आज समजले मला
तू प्रेमाचे मोल अलौकिक का सांगितले मला