हाक

नाही कुणी उरला वाली

याद तुझी आली देवा __ याद तुझी आली ||धृ||

भोवऱ्यात गरगर फिरते संसाराची नाव

फिरोनिया थकलो देवा आता तरी धाव

मती गुंग झाली माझी __ मती गुंग झाली माझी

आशाही बुडाली

याद तुझी आली देवा __ याद तुझी आली ||१||

सांग कोठे लपले पुण्य जगी भरले पाप

जाऊ सांग कोठे देवा तूच मायबाप

तुझ्या दारी घेवून आलो __ तुझ्या दारी घेवून आलो

रिकामी ही झोळी

याद तुझी आली देवा __ याद तुझी आली ||२||

माणसाची वैरीण झाली माणसाची जात

पांघरून माणूस फिरतो दानवाची कात

राहिलो मी माणूस देवा _ राहिलो मी माणूस देवा

ही का चूक झाली

याद तुझी आली देवा __ याद तुझी आली||३||