झरा

त्रिभुवन फिरलो असा अलौकिक गुरु पाहिला नाही
निव्वळ तुझिया नजरेमधुनी झरा दुधाचा वाही

गतजन्मीचे पुण्य म्हणू की या जन्माची पुण्याई
जन्मदात्रीसम माया वर्षे गुरू म्हणावे की आई
उल्लंघूनी तुज प्रमाद केले कोटी कोटी गणना नाही
निव्वळ तुझिया नजरेमधुनी झरा दुधाचा वाही

कुठे तू असशी कुठे तू वसशी दूर दूर गुरूराया
मम ह्रदयीची हाक पोचते कशी तुझ्या रे ह्रदया
क्षणात येशी तू निजभेटी उभा ठाकुनी राही
निव्वळ तुझिया नजरेमधुनी झरा दुधाचा वाही

ह्रदयस्पंदने माझी असती, अहंकार हा मनी
ह्रदयस्पंदनी वसशी तूचि सत्य न उमगे जनी
सतत करोनी तुझी वंचना मद बाणवला जरी देही
निव्वळ तुझिया नजरेमधुनी झरा दुधाचा वाही

सर्व रिपूंचे वसतीस्थान मी असेच जग ओळखे
खलिफानाथे रूप बदलले मीच मला नोळखे
तू मी दोन्ही एक जाहले, एकही उरला नाही
निव्वळ तुझिया नजरेमधुनी झरा दुधाचा वाही