लावणी

दाणे घालून राया तुम्ही भुलवू नका
नजर रोखून राया तुम्ही भिववू नका
माझ्या कबुतरांना हात लावू नका

जीवा-भावाने जपलीय जोडी
नका करू तुम्ही लाडीगोडी
ठाव हाये तयांना तुमची खोडी
तुम्हा पाहून मारलीय दडी
लाज अडवी तयांना तुम्ही निरखू नका
माझ्या कबुतरांना हात लावू नका

दिसामासान वाढतीय काया
एक दुजाची भासे जणू छाया
लई नाजूक साजूक माया
नका जावू तयांना धराया
स्पर्श करून तंग त्यांना करू नका
माझ्या कबुतरांना हात लावू नका