रुसवा

पैलतीरावर राधा झुरते, ऐकण्यास मुरलीची तान
ऐलतीरी मुरलीचा रुसवा, घनश्याम हैराण

ओठावरती मला धरी परी मनात वसते राधा
ओठामधूनी फुंकर येते, त्यातही ठसते राधा
चुंबून मजला, स्पर्शून मजला, का करिशी बेभान
ऐलतीरी मुरलीचा रुसवा, घनश्याम हैराण

मधुर उमटली धुन, देती जन ह्रुदयामधुनी दाद
नाद मधुर मी परी जाणते, राधेला ही साद
कोण तुझी मी, थिरकून काहून करू मी मंजूळ गान 
ऐलतीरी मुरलीचा रुसवा, घनश्याम हैराण

तूच श्वास अन निश्वासही तू, यातच माझे जगणे
मम ह्रदयीच्या हुंकारातुन तुझेच उमटे गाणे
तुझ्याविना मी शवापरी, तुज जरा न राही भान
ऐलतीरी मुरलीचा रुसवा, घनश्याम हैराण