नवा डाव नवा खेळ

पुन्हा एक नवे वर्ष
पुन्हा एक नवी वेळ
पुन्हा सुरु करा चला
नवा डाव नवा खेळ

सवयीचा गुलाम म्हणतो 

जुने दळण पुन्हा दळा 
घडाळ्याच्या काट्यावरती

पुन्हा एकदा पळा पळा 

सकारात्मक स्वीकार करा
गुलामाचे विचार टाळा
जुने जीर्ण सोडा आता

नव्याकडे सारे वळा

विचारांची भरवा शाळा
विचारांचा फुलवा मळा 
विचारांच्या मेळ्यांमध्ये
विचारांचे पीठ मळा

दिव्यामध्ये पुन्हा तेल 
भरून नवी वात जाळा 
काळोखाच्या आक्रोशातून
प्रकाशाचे गाणे उजळा 

प्रकाशाच्या नाना तऱ्हा
कोवळे ऊन मध्यान्ही झळा
जीवनाच्या अंगी पहा 
नाना रंग नाना कळा

जीवनाच्या रेसमध्ये
जोर लावून पुन्हा पळा
ध्येय पुन्हा गाठण्यासाठी
धीर धरा सोसा कळा

पुन्हा सुरु करा चला
नवा डाव नवा खेळ
पुन्हा एक नवे वर्ष
पुन्हा एक नवी वेळ